Stökkir kjúklingaleggir á fjóra vegu (fyrir 4-5)

Hráefni

12 stk. kjúklingaleggir
2 hvítlauksgeirar, pressaðir
1 msk. engifer, fínt saxað
½ chilialdin, fræhreinsað og skorið í sneiðar
1 tsk. kjúklingakraftur

Aðferð

• Setjið allt í pott, ásamt svo miklu vatni að rétt fljóti yfir leggina, og sjóðið við vægan hita í 20-25 mín. Takið leggina úr vatninu og kælið.
• Útbúið hjúp (sjá fjórar mismunandi uppskriftir að hjúp hér að neðan)og veltið leggjunum upp úr honum. Djúpsteikið leggina í 170-180°C heitri olíu í 3-5 mín. eða þangað til leggirnir eru orðnir fallega brúnir og heitir í gegn. Einnig má steikja þá í 200°C heitum ofni í 7-10 mín. eða þangað til þeir verða fallega brúnir.

Kókos- og karríhjúpur

1-2 msk. karríduft
2 dl hveiti
2 egg, pískuð
2 dl rasp
1 dl kókosmjöl

Aðferð

• Blandið saman karríi og hveiti, veltið leggjunum upp úr blöndunni og síðan upp úr eggjunum.
• Blandið raspinu saman við kókosmjölið og veltið leggjunum að síðustu upp úr því.

Kryddjurtahjúpur

1 dl hveiti
1 msk. blandað jurtakrydd
salt og pipar
2 egg, pískuð
2 dl rasp
1-2 hvítlauksgeirar, pressaðir
1 dl fínt saxaðar kryddjurtir, t.d. basilikum, steinselja, timian, estragon eða graslaukur
2 msk. parmesanostur

Aðferð

• Blandið saman hveiti, jurtakryddi, salti og pipar og setjið í skál.
• Þá er raspinu, kryddjurtunum, hvítlauknum og parmesanostinum blandað saman í aðra skál.
• Veltið leggjunum fyrst upp úr hveitiblöndunni, þá upp úr eggjunum og síðast upp úr raspinu.

Hnetuhjúpur

1 dl hveiti
1 tsk. kjúklingakrydd (t.d. chickenseasoning)
2 egg, pískuð
1-2 tsk. hnetusmjör
1 dl rasp
1 dl blandaðar hnetur, kurlaðar

Aðferð

• Blandið saman hveiti og kjúklingakryddi.
• Þeytið saman egg og hnetusmjör.
• Blandið saman raspi og hnetukurlinu.
• Veltið leggjunum fyrst upp úr hveitiblöndunni, þá upp úr eggjunum og síðast upp úr raspinu.

Mexíkóskur nachos-hjúpur

1 dl hveiti
1-2 msk. blandað mexíkókrydd
2 egg, pískuð
2 dl nachos, kurlað í matvinnsluvél

Aðferð

• Blandið saman hveiti og kryddi og veltið leggjunum fyrst upp úr
hveitiblöndunni, síðan upp úr eggjunum og að lokum upp úr nachoskurlinu.